आईसीटी समाचार
काठमाडौं । स्मार्ट टेलिकमसँग सम्बन्धित अनुसन्धानका क्रममा नेपाल दूरसञ्चार प्राधिकरणका पूर्व अध्यक्ष भुपेन्द्र भण्डारीलाई नेपाल प्रहरीको केन्द्रीय अनुसन्धान ब्युरो (सिआईबी) ले नियन्त्रणमा लिएको छ ।
सिआईबीका प्रवक्ता तथा प्रहरी वरिष्ठ उपरीक्षक अनुपम शमशेर जबराका अनुसार भण्डारीलाई स्मार्ट टेलिकमसम्बन्धी अनुसन्धानका लागि बिहीबार बेलुकीदेखि नियन्त्रणमा राखिएको हो ।
"उहाँ हाल अनुसन्धानकै सिलसिलामा हाम्रो नियन्त्रणमा हुनुहुन्छ । स्मार्ट टेलिकमसँग सम्बन्धित विषयमा थप अनुसन्धान गर्न नियन्त्रणमा लिइएको हो," प्रवक्ता जबराले जानकारी दिए ।
यसैबीच, केही दिनअघि व्यवसायी उपेन्द्र महतोलाई पनि सिआईबीले सोधपुछका लागि बोलाएको थियो । तर, महतोसँग गरिएको सोधपुछ स्मार्ट टेलिकम प्रकरणसँग प्रत्यक्ष सम्बन्धित नभई अन्य विषयमा रहेको र उनी हाजिर जमानीमा रिहा भइसकेको सिआईबीले स्पष्ट पारेको छ ।
यसअघि स्मार्ट टेलिकमका उपकरण बैंकिङ लिलामीमार्फत बिक्री गरिएको प्रकरणमा कम्पनीका सञ्चालक सर्वेश जोशी र नेपाल इन्भेष्टमेन्ट मेगा बैंकका तत्कालीन प्रमुख कार्यकारी अधिकृत (सीईओ) ज्योति प्रकाश पाण्डेलाई पनि सिआईबीले पक्राउ गरेको थियो ।
पछि सर्वोच्च अदालतको आदेशपछि पाण्डे रिहा भएका थिए भने जोशीलाई पनि केही दिनपछि हाजिर जमानीमा छाडिएको थियो । स्मार्ट टेलिकमसँग सम्बन्धित विभिन्न आर्थिक तथा प्रशासनिक पक्षबारे सिआईबीले अनुसन्धानलाई निरन्तर अघि बढाइरहेको जनाएको छ ।
