आईसीटी समाचार
विश्वभर छरिएर रहेका नेपाली समुदायलाई एउटै डिजिटल सञ्जालमा जोड्ने उद्देश्यसहित ‘नेप्लिफाई’ (Neplify) ले नयाँ वर्ष २०८३ को अवसर पारेर आफ्नो मोबाइल एप विश्वव्यापी रूपमा सार्वजनिक गरेको छ। “One Nation, Global Connection” भन्ने नारासहित अघि बढाइएको यो प्लेटफर्मलाई नेपाली डायस्पोराका लागि ‘डिजिटल घर’ का रूपमा विकास गर्ने लक्ष्य राखिएको कम्पनीले जनाएको छ।
क्यानडाको टोरन्टोमा प्रधान कार्यालय रहेको नेप्लिफाईले सन् २०२५ जनवरी १ मा NepaleseCenter.com मार्फत आफ्नो डिजिटल यात्रा सुरु गरेको थियो। छोटो समयमै प्रयोगकर्ताबाट राम्रो प्रतिक्रिया पाएपछि कम्पनीले सन् २०२५ मे १६ मा यसलाई नेप्लिफाई नाममा पुनःब्रान्डिङ गरेको थियो। त्यसयता neplify.com मार्फत सेवा विस्तार गर्दै आएको कम्पनीले अब वैशाख १ गतेदेखि एन्ड्रोइड र आईओएस दुवै संस्करणमा मोबाइल एप सार्वजनिक गरेको हो।
नेप्लिफाईको मुख्य विशेषता यसको खुला र निःशुल्क प्लेटफर्म हो। कम्पनीका अनुसार नेपाली उद्यमी, साना व्यवसायी, स्वरोजगार व्यक्ति तथा स्वतन्त्र पेशेवरहरूले आफ्ना सेवा र उत्पादनहरू यसमा कुनै शुल्कबिना सूचीबद्ध गर्न सक्नेछन्। यसले प्रवासमा रहेका नेपाली व्यवसायीलाई आफ्नै समुदायभित्र पहुँच विस्तार गर्न र नयाँ अवसर खोज्न सहयोग पुर्याउने अपेक्षा गरिएको छ।
एपमार्फत प्रयोगकर्ताले विभिन्न सेवा र अवसर एउटै ठाउँमा प्राप्त गर्न सक्नेछन्। यसमा कार्यक्रमहरू, नेपाली खाना तथा रेस्टुरेन्ट, सेवा र उत्पादन, उपहार पठाउने सुविधा, रोजगारी तथा इन्टर्नसिप, र बसोबाससम्बन्धी जानकारी समावेश गरिएको छ। विशेषगरी, नेपाली समुदाय लक्षित कार्यक्रम, व्यवसाय र अवसरलाई एउटै डिजिटल माध्यमबाट सजिलै पहुँचयोग्य बनाउने उद्देश्य लिइएको छ।
नेप्लिफाई केवल व्यावसायिक प्लेटफर्म मात्र नभई समुदाय जोड्ने डिजिटल पहल पनि हो। कम्पनीले सञ्चालन गर्दै आएको ‘वाक्य’ (Vakya) नामक पोडकास्टमार्फत नेपाली अनुभव, विचार र ज्ञान साझा गर्दै आएको छ, जसले प्रवास र नेपालबीचको संवादलाई थप बलियो बनाइरहेको कम्पनीको दाबी छ।
कम्पनीका संस्थापक तथा सीईओ देवेन्द्र नेपालका अनुसार, “हाम्रो लक्ष्य विश्वभर रहेका नेपालीलाई एउटै प्लेटफर्ममा जोड्दै अवसर, सेवा र जानकारीमा सहज पहुँच दिलाउनु हो। आगामी दिनमा हामी एआईलगायतका प्रविधि थप गर्दै प्रयोगकर्ताको अनुभव अझ प्रभावकारी बनाउनेछौं।”
नेप्लिफाईले प्रवासमा रहेका नेपाली समुदायको सामाजिक, आर्थिक र व्यावसायिक सञ्जाललाई डिजिटल रूपमा एकीकृत गर्ने प्रयासलाई नयाँ चरणमा पुर्याएको देखिन्छ।
