आईसीटी समाचार
काठमाडौं । नेपाल टेलिकमले लामो समयदेखि बक्यौता महशुल नतिरेका ग्राहकलाई राहत दिने उद्देश्यले विशेष योजना सार्वजनिक गरेको छ । कम्पनीले आर्थिक वर्ष २०८०/८१ सम्मको दूरसञ्चार सेवा उपयोग गरेबापत बाँकी रहेको रकम निश्चित अवधिभित्र भुक्तानी गरेमा त्यसमा लाग्ने सम्पूर्ण जरिवाना मिनाहा गर्ने निर्णय गरेको हो ।
टेलिकमले जारी गरेको सूचनाअनुसार ग्राहकले २०८३ साल पुस मसान्तभित्र आफूलाई पायक पर्ने दूरसञ्चार कार्यालयमा पुगेर मूल बक्यौता रकम बुझाए जरिवाना तिर्नुपर्ने छैन । कम्पनीले यस व्यवस्थालाई पुराना बक्यौता फर्छ्योट गर्ने अवसरका रूपमा लिन ग्राहकलाई आग्रह गरेको छ ।
यद्यपि, तोकिएको समयसीमाभित्र पनि बक्यौता रकम नतिर्ने ग्राहकविरुद्ध कानुनी प्रक्रिया अघि बढाइने टेलिकमले स्पष्ट पारेको छ । त्यस्ता ग्राहकको नाम, ठेगाना र बक्यौता विवरण कम्पनीको आधिकारिक वेबसाइट तथा राष्ट्रिय दैनिक पत्रपत्रिकामार्फत सार्वजनिक गरिने जनाइएको छ ।
यसका साथै, बारम्बार ताकेता गर्दा पनि रकम भुक्तानी नगर्ने ग्राहकबाट सरकारी बाँकी सरह असुलउपर गरिने प्रक्रिया अघि बढाइने टेलिकमले जनाएको छ । कम्पनीले समयमै बक्यौता फर्छ्योट गरी उपलब्ध सहुलियतको लाभ लिन सबै ग्राहकलाई अनुरोध गरेको छ ।
