शुक्रबार नेपाल युवा उद्यमी मञ्च (एनवाईईएफ) काठमाडौं च्याप्टरले आयोजना गर्दै आएको स्टार्टअप अवार्ड्सको ग्राण्ड फिनाले आयोजना हुने भएको छ । 

नेपाल सरकारका मुख्यसचिव डा. वैकुण्ठ अर्यालको प्रमुख आतिथ्यतामा पुस २७ गते शुक्रबार द सोल्टी काठमाडौंमा हुने तेस्रो संस्करणको स्टार्टअप अवार्ड्सको फाइनल हुने भएको हो । ग्राण्ड फिनालेमा प्राप्त आवेदनमध्येबाट उत्कृष्टलाई स्टार्टअप अवार्डसँगै सोसियल इन्टरप्राइज अवार्ड र अडियन्स पिक अवार्ड प्रदान गरिने छ । 

यस वर्षको स्टार्टअप अवार्ड्समा देशभरबाट १५० आवेदन प्राप्त भएको थियो । प्राप्त आवेदन मध्येबाट उत्कृष्ट २० हुँदै उत्कृष्ट ७ स्टार्टअपसम्म छनौट भइसकेका छन् । उत्कृष्ट ७ स्टार्टअपलाई पिचिङ र जुरीको निर्णयको आधारमा अवार्ड प्रदान गरिने छ । उत्कृष्ट ७ स्टार्टअपले शुक्रबार नै आफ्नो आईडिया पिचिङ गर्नेछन् । 

स्थानीय स्टार्टअप इकोसिस्टमलाई बलियो बनाउन विगत २ वर्षदेखि एनवाईईएफ स्टार्टअप अवार्ड्स आयोजना गर्दै आएको  एनवाईईएफ काठमाडौं च्याप्टरकी अध्यक्ष प्रार्थना शाखःले जानकारी दिइन । 

उत्कृष्ट ७ स्टार्टअपमा गल्ली म्याप्स, पेट मामा, ब्ल्यांकसर, बीबाबो, दूरशिक्षा, क्विकफक्स कन्सल्टिङ र भूमिथान रहेका छन् ।  यसअघि स्टार्टअप अवार्ड्सले उत्कृष्ट २० स्टार्टअपलाई ६ वटा एक्सपर्ट सेसन सञ्चालन गरेको थियो । त्यसपछि उत्कृष्ट २० स्टार्टअपले गरेको पिचिङका आधारमा उत्कृष्ट ७ स्टार्टअप छनौट भएका थिए । 

उत्कृष्ट ७ स्टार्टअपलाई एक-एक जना मेन्टर असाइन गरिएको थियो । मेन्टरहरूले स्टार्टअपलाई मार्गनिर्देशन गरेका थिए । मार्गनिर्देशनको आधारमा समेत शुक्रबार डेमो डेमा उत्कृष्ट ७ स्टार्टअपले पिच गर्दै छन् । सो पिचङका आधारमा ३ स्टार्टअपलाई अवार्ड्स प्रदान गरिने एनवाईईएफले जनाएको छ । विजेताहरूलाई नगद पुरस्कारको पनि व्यवस्था गरिएको छ । 

फिनालेमा नेपालका लगानीकर्ता समेत सहभागी हुनेछन् । उनीहरूले आफुलाई मन परेको स्टार्टअपमा ठाउँको ठाउँ लगानी समेत गर्न सक्ने छन् । विगत २ वर्षदेखि एनवाईईएफ काठमाडौंले आयोजना गर्दै आएको स्टार्टअप अवार्ड्समा यस वर्षदेखि एनवाईईएफका सबै च्याप्टर तथा गभर्निङ काउन्सिलको समेत सहकार्य रहेको छ ।

नेपाल उद्योग वाणिज्य महासंघको सहकार्यमा हुन लागेको सलिकोको प्रस्तुती एनवाईईएफ स्टार्टअप अवार्ड्समा एनएमबी बैंक, नेपाल प्राइभेट इक्विटी एशोशिएसन, एपेक्स कलेज, अन्तरप्रेरणा, एडेक्स, आईडिया स्टुडियो र न्यास आईटी लगायतका विभिन्न संघसंस्थाको सहयोग तथा सहकार्य रहेको छ ।