नेपालको सबैभन्दा ठूलो इन्टरनेट सेवा प्रदायक कम्पनी वर्ल्डलिंक कम्युनिकेसनले आज २६ औं वार्षिकोत्सव मनाउँदै छ । नेपालको तेस्रो ठूलो दूरसञ्चार कम्पनी समेत रहेको वर्ल्डलिंकले सन् १९९५ मा ईमेल सेवा मार्फत आफ्नो सेवा सुरु गरेको थियो ।

सन् १९९५ इमेल सेवाबाट सुरु भएको वर्ल्डलिंकले त्यसको दुई वर्षपछि डायलप इन्टरनेट सेवा सुरु गरेको थियो । त्यस्तै, सन् १९९९ मा भिस्याटबाट अन्तर्राष्ट्रिय व्यान्डविथ ल्याउने र त्यही बेला काठमाडौं बाहिर पनि सेवा विस्तार सुरु गरेको थियो ।

सन् २००० मा वायरलेस ब्रोडव्यान्ड इन्टरनेट सेवा सुरुसँगै थुप्रै अन्तर्राष्ट्रिय कम्पनीसँग कन्टेन क्यासको लागि पार्टनरसिप सुरु भयो । वर्ल्डलिंकले नेपालमा पहिलो कन्टेन क्यास सेटअप गर्न अकमइसँग साझेदारी गरेको थियो ।

सन् २००२ मा देशभरी नै भिसेट नेटवर्क तयार गर्‍यो जसले देशका मुख्य सहरहरु जोडिए । अर्को वर्षदेखि केवल इन्टरनेट सेवा सुरु गरेपछि वायरेसबाट वायरमा जाँदा गुणस्तर सुधारमा धेरै सहयोग गर्यो ।

सन् २००६ मा राष्ट्रमा वायरलेस व्याकबोनको स्थापना गर्यो । यसले पनि मुख्य सहरहरुलाई जोड्न सजिलो भयो । पहिले जसरी भिस्याटबाट भइरहेको थियो, त्यसलाई वायरलेसमा परिवर्तन भयो । त्यसको दुई वर्षपछि अन्तर्राष्ट्रिय व्यान्डविथको लागि क्रस बोर्डर फाइबरको सेटअप गर्यो ।

सन् २०१० मा कन्टेन क्यासको लागि गुगलसँग साझेदारी भयो । सन् २०१२ वर्ल्डलिंकले पहिलो पटक १० एमबीपीएसको केवल इन्टरनेट सेवा सुरुवात गरेका थियो ।

सन् २०१४ देखि घरघरमा फाइबर इन्टरनेट (एफटिटिएच) ब्रोडव्यान्ड सेवा सुरु गरेको थियो । केवल इन्टरनेटमा भएका गुणस्तरका समस्याहरुलाई यसले समाधान गर्यो । एफटीटीएचको सुरुवातसँगै नेटवर्क विस्तारमा सजिलो भयो भने ग्राहकको संख्या वृद्धिमा तीव्रता आयो । यसमा लगानी वृद्धि गर्दै गए ।

वर्ल्डलिंकले सन् २०१६ मा आईपीटीभी सुरुवात गर्यो । नेपालमा पहिलो पटक वर्ल्डलिंकले नै आईपीटीभी सुरुवात गरेका थियौं । यसले ग्राहक माझ एउटै तारबाट इन्टरनेट र टिभी हेर्न सकिने भएको थियो ।

त्यसै वर्ष कन्टेन क्यासको लागि फेसबुकसँग फेरि साझेदारी भयो । यसरी प्रगति गर्दै गएको वर्ल्डलिंक सन् २०१७ मा मुलुकमा सूचना तथा सञ्चार प्रविधि क्षेत्रमा सबैभन्दा धेरै करदाता भनेर नेपाल सरकारबाट सम्मानित भयो ।

वर्ल्डलिंकले सुरक्षित इन्टरनेट प्रयोग गर्न कन्टेन फिल्टरिङ गर्ने ‘सेपरेट’ भन्ने सार्वजनिक गर्यो । यो केटाकेटीको लागि अनलाइन ‘प्रोटेक्सन’ थियो ।

वर्ल्डलिंकले सन् २०१८ मा ‘फ्रि वाईफाई’ सेवा सुरुवात गर्यो । जुन आजको दिनमा ११ हजार बढी ठाउँमा पुगिसकेको छन् । वर्ल्डलिंकका प्रयोगकर्ताले यी ठाउँमा सजिलै वाईफाई चलाउन सक्छन् । यस्ता पब्लिक वाईफाईमा दैनिक १ लाख ५० हजारभन्दा धेरै प्रयोगकर्ता जोडिन्छन् ।

सन् २०१९ मा नेपाल सरकारबाट नेसनल आइसिटी अवार्ड पाएको वर्ल्डलिंकले त्यसै वर्ष नेपाल दूरसञ्चार प्राधिकरणको ग्रामिण दूरसञ्चार कोषको परियोजना अन्तर्गत कर्णालीको दुर्गम ठाउँमा ब्रोडव्यान्ड इन्टरनेट पुर्यायो । उक्त वर्ष सीडीसीबाट विदेशी लगानी भित्रयाउन सफल भएको थियो ।

चार हजारभन्दा धेरैलाई रोजगारी दिएर वर्ल्डलिंक सूचना तथा सञ्चार प्रविधि क्षेत्रमा सबैभन्दा रोजगारी दिने कम्पनी बनेको छ । हालसम्म वर्ल्डलिंकको सेवा ५ लाख बढी घरमा सेवा उपलब्ध गराइसकेको छ । अबको ५ वर्षमा २० लाख घरधुरीमा इन्टरनेट पुर्‍याउने कम्पनीको योजना रहेको छ ।

कम्पनीले देशका ७३ वटा जिल्लामा आफ्नो सेवा विस्तार गरिसकेको छ । नेपालमा भित्र्याइएको इन्टरनेटको कुल ब्यान्डविथमध्ये ४५ प्रतिशत व्याण्डविथ वर्ल्डलिंक एक्लैले प्रयोग गर्छ ।