आईसीटी समाचार
हुवावे नेपालले महिला कर्मचारीहरूका लागि स्वास्थ्य जागरूकताका साथ अन्तर्राष्ट्रिय महिला दिवस मनाएको छ । अन्तर्राष्ट्रिय महिला दिवसको अवसरमा हुवावे नेपालले हात्तीसारस्थित हुवावे टावरमा महिला स्वास्थ्य जागरूकता सत्र आयोजना गरेको थियो ।
महिलाहरूमा व्यापक रूपमा देखिने–पाठेघरको क्यान्सर र पोलिसिस्टिक ओभरी सिन्ड्रोम (पिसिओएस) मा केन्द्रित गर्दै महिला कर्मचारीहरूका लागि महत्वपूर्ण जानकारी प्रदान गर्ने उद्देश्यले कार्यक्रम गरिएको ह्वावेको भनाइ छ ।
महिला स्वास्थ्य विशेषज्ञले पाठेघरको क्यान्सर र पोलिसिस्टिक ओभरी सिन्ड्रोमका जोखिम कारकहरू, यसका लक्षणहरू र रोकथामका उपायहरू साथै उपचारका विकल्पहरूबारे विस्तृत जानकारी दिएका थिए ।
छलफलमा पाठेघरको क्यान्सर र पिसिओएस लगायत धेरै स्वास्थ्य समस्याहरूलाई प्रारम्भिक स्क्रिनिङ जीवनशैली परिमार्जन र समयमै चिकित्सा चेकजाँच मार्फत व्यवस्थापन वा रोकथाम गर्न सकिन्छ भन्ने कुरामा पनि जोड दिइएको थियो ।
लैंगिक समावेशिता र कर्मचारी कल्याण पहलहरूको हिस्साको रूपमा हुवावे नेपालले कार्यस्थलको स्वास्थ्यकर वातावरण सुनिश्चित गर्न हावा गुणस्तर, पानीको गुणस्तर र खाद्य सुरक्षाको नियमित अनुगमनमार्फत स्वास्थ्यको सुनिश्चितता गर्दै आएको छ।
पर्यावरण, स्वास्थ्य, र सुरक्षा नीतिअन्तर्गत, कम्पनीले आगलागी नियन्त्रण अभ्यास तथा अन्य कार्यस्थल सुरक्षासम्बन्धी कार्यक्रमहरू सञ्चालन गरी उच्चतम व्यावसायिक स्वास्थ्य र सुरक्षाका मापदण्डहरू कायम राख्ने कार्य गर्दै आएको छ। यस्ता पहलहरूमार्फत हुवावे नेपालले सबै कर्मचारीहरूको लागि स्वास्थ्य, समावेशी र सशक्त कार्यस्थल निर्माण गर्न खोजेको देखिन्छ ।
