इटालियन पत्रिकाले विश्वमै पहिलो पटक प्रकाशन गर्‍यो पूर्ण रूपमा एआईले तयार गरेको संस्करण

इटालियन पत्रिका इल फोलियोले पूर्ण रूपमा कृत्रिम बुद्धिमत्ता (एआई) द्वारा तयार गरिएको संस्करण प्रकाशित गरेको छ । पूर्ण रूपमा एआईबाट तयार गरिएको संस्करण प्रकाशित गर्ने इल फोलियो विश्वकै पहिलो संस्था भएको दावी गरिएको छ । 

चार पृष्ठको विशेष संस्करण पत्रिकाको नियमित ब्रोडशीट संस्करणसँग संलग्न गरिएको थियो । गत मंगलबारदेखि अनलाइन तथा छापाको रूपमा एआई संस्करणलाई उपलब्ध गराइएको छ । इल फोलियोका सम्पादक क्लाउडियो सेरासाले एआई संस्करणमा समावेश भएका सम्पूर्ण लेख, शीर्षक तथा सामग्री एआईले तयार गरेको जानकारी दिएका छन् । 

उनले पत्रकारको भूमिका एआईलाई प्रश्न सोध्ने र प्राप्त उत्तर पढ्नेमा सीमित हुन सक्ने द गार्जिएनसँग बताएका छन् । एआईले पत्रकारिता र दैनिक कार्यमा पार्ने प्रभाव बारे थाहा पाउन एक महिना लामो प्रयोगको रूपमा यो परीक्षणको थालेको पत्रिकाको भनाइ छ । यो प्रयोग त्यस्तो समयमा गरिएको हो, जतिबेला समाचार संस्थाहरू एआई कसरी प्रयोग गर्ने भन्ने विषयमा संघर्ष गरिरहेका छन् ।

च्याटजीपीटी एआईबाट तयार गरिएको विशेष संस्करणमा विभिन्न समाचार समावेश गरिएका छन्, जसमा ट्रम्प समर्थक इटालियनहरूको विषयमा एउटा लेख प्रकाशित गरिएको छ । उक्त लेखमा उनीहरूले ‘क्यान्सिल कल्चर’ को विरोध गरे पनि अमेरिकी राष्ट्रपति डोनाल्ड ट्रम्पको कथित दोहोरो व्यवहारलाई समर्थन गर्ने प्रवृत्तिबारे चर्चा गरिएको छ ।

त्यस्तै, अर्को समाचारमा रूसी राष्ट्रपति भ्लादिमिर पुटिन सम्बन्धी सामग्री समावेश छ, जसमा उनले पछिल्लो २० वर्षमा गरेका सम्झौता उल्लङ्घन तथा प्रतिबद्धताहू भंगका घटनाहरू प्रकाश पारिएको छ ।

इटालियन अर्थतन्त्रसम्बन्धी अर्को लेखमा आयकर सुधारका कारण ७ लाख ५० हजार कामदारहरूको तलब वृद्धि भएको विवरण प्रस्तुत गरिएको छ । अन्तिम पृष्ठमा एआईले जेनेरेट गरेर सम्पादकलाई लेखेका चिठिहरू समावेश गरिएको छ, जसमा एउटामा एआईले भविष्यमा मानिसहरूलाई ‘युजलेस’ बनाउँछ कि भनेर सोधिएको छ ?

यसको एआईले दिएको उत्तरमा भनिएको छ, ‘एआई ठूलो आविष्कार हो । तर यसले अहिलेसम्म चिनी ठीक्कसँग मिलाएर कफी अर्डर गर्न जान्दैन ।’ इल फोग्लियो एआईले ‘वास्तविक अखबार’लाई प्रतिबिम्बित गरेको तथा यो समाचार, बहस र उत्तेजनाको उत्पादन भएको सेरासाले बताएका छन् ।

तर यो एउटा परीक्षण पनि थियो, जसले एआईले व्यवहारमा कसरी काम गर्न सक्छ भनेर देखाएको उनको भनाइ छ । एआईले पत्रकारितालाई समाप्त नपार्ने र बरू रचनात्मकता बढाउँदै मेसिनले गर्न सक्ने कामहरू नगर्ने बासी बसाल्नुपर्ने बताइएको छ ।