सामाजिक सञ्जालमा मोनिटाइजेशनको नाममा ठगी बढ्दो, प्रयोगकर्ता सतर्क हुन आग्रह

काठमाडौं । पछिल्लो समय सामाजिक सञ्जालमा फेसबुक, टिकटक वा अन्य डिजिटल प्लेटफर्मको मोनिटाइजेशन सहज, सस्तो वा ग्यारेन्टीका साथ उपलब्ध गराइदिने भन्दै भ्रमपूर्ण विज्ञापन तथा मेसेजहरू तीव्र रूपमा फैलिन थालेपछि सम्बन्धित निकाय तथा साइबर सुरक्षा विज्ञहरूले सर्वसाधारणलाई सचेत रहन आग्रह गरेका छन् ।

विशेष गरी सामाजिक सञ्जाल प्रयोगकर्तालाई “Verification”, “Support” वा “Monetization Approval” को बहानामा फिसिङ लिंक पठाई अकाउन्टको पासवर्ड, OTP वा रिकभरी कोड माग्ने प्रवृत्ति बढ्दो देखिएको छ । यस्ता लिंकमार्फत प्रयोगकर्ताको गोप्य विवरण प्राप्त गरेपछि ठगी समूहले सम्बन्धित फेसबुक पेज, टिकटक अकाउन्ट वा अन्य डिजिटल च्यानल कब्जामा लिएर आर्थिक तथा व्यक्तिगत क्षति पुर्‍याउने गरेका छन् ।

साइबर सुरक्षा सम्बन्धी जानकारहरूका अनुसार कुनै पनि आधिकारिक कम्पनी वा सामाजिक सञ्जाल प्लेटफर्मले प्रयोगकर्तासँग मेसेजमार्फत पासवर्ड, OTP वा रिकभरी कोड कहिल्यै माग्दैन । Monetization सम्बन्धी सम्पूर्ण प्रक्रिया सम्बन्धित आधिकारिक प्लेटफर्म, जस्तै Meta Business Suite, TikTok Creator Tools वा YouTube Studio जस्ता आधिकारिक माध्यमबाट मात्र गर्नुपर्छ ।

सामाजिक सञ्जाल प्रयोगकर्तालाई अपरिचित व्यक्ति, आकर्षक विज्ञापन वा अविश्वसनीय प्रस्तावको प्रलोभनमा नपरी आफ्नो गोप्य विवरण सुरक्षित राख्न आग्रह गरिएको छ । विज्ञहरूले “सस्तोमा Monetization”, “ग्यारेन्टी Approval” वा “तत्काल Verification” जस्ता दाबी प्रति विशेष सतर्कता अपनाउनु पर्ने बताएका छन् ।

यदि कसैले अनलाइन ठगीको सामना गरेको छ वा यस्ता गतिविधि देखेको छ भने तत्काल नजिकको प्रहरी कार्यालय वा सम्बन्धित साइबर ब्यूरोमा सम्पर्क गर्न प्रहरीले अनुरोध गरेको छ । प्रहरीले “सचेत बनौँ, डिजिटल दुनियाँमा सुरक्षित रहौँ” भन्ने सन्देशसहित सर्वसाधारणलाई साइबर सुरक्षा प्रति जिम्मेवार बन्न आग्रह गरेको छ ।