क्यान महासंघ बाँके शाखाको आयोजनामा फागुन २० गते देखि २४ गतेसम्म नेपालगञ्जको सिद्धार्थ कटेजको प्राङगणमा आयोजना हुने क्यान इन्फोटेकको तयारी तिब्र रुपमा भइरहेको छ ।

नेपालगञ्जमा हुने क्यान इन्फोटेकको बारेमा क्यान महासंघ बाँकेका अध्यक्ष रमणी प्रसाद शर्मासंग गरिएको कुराकानीको केही अशं ।

नेपालगञ्जमा आयोजना हुने इन्फोटेकको उदेश्य के हो ?

विश्वमा सूचना तथा संचार प्रविधि क्षेत्रमा भएका विकास तथा नयाँ-नयाँ प्रविधिको बारेमा जानकारी प्रदान गर्ने उद्देश्यले नेपालगञ्जमा ‘प्रभु पे क्यान इन्फोटेक २०२० इन एशोशिएसन विथ वर्ल्ड लिंक’ आयोजना गर्देछौं ।

यो क्यान इन्फोटेकमा क्यान महासंघका सदस्य संस्थाहरु लगायत विभिन्न राष्ट्रिय तथा अन्तराष्ट्रिय सूचना तथा सञ्चार प्रविधि सम्बन्धी कम्पनीहरुको सहभागिता रहने छ ।

नेपालगञ्जमा इन्फोटेक आयोजना गर्नुको मुख्य उदेश्य भनेको धेरै भन्दा धेरैलाई सूचना प्रविधि सम्बन्धि जानकारी प्रदान गर्नु रहेको छ ।

इन्फोटेकमा कतिवटा स्टल रहेका छन् ?

इन्फोटेकमा ९० वटा प्रदर्शनी स्टल राखेका छौं । जस अन्तर्गत हार्डवेयर सेल्स तथा मेन्टेनेन्स, पावर सोलुसन, मोबाइल एशोसरिज, डिलर र डिस्ट्रिव्युटर्स, इन्टरनेट सेवा प्रदायक, टेलिकम्युनिकेशन, बैंक, आइसीटी कलेज, शैक्षिक परामर्श केन्द्र, ट्रेनिङ इन्स्चियुट, सफ्टवेयर सोलुसन, पेमेन्ट सोलुसन र विभिन्न नयाँ प्रविधिको प्रयोग गरी स्थानिय विद्यार्थीहरुले बनाएका प्रविधियुक्त हाडवेयर र सफ्टवेयरसँग सम्बन्धित स्टल रहेका छन् ।

प्रवेशको व्यवस्था कसरी मिलाउनु भएको छ ?

पाँच दिनसम्म संचालन गरिने प्रदर्शनीमा अवलोकनका लागि सर्वसाधारणलाई ३० रुपैयाँ र विद्यार्थीहरुलाई २० रुपैयाँ प्रवेश शुल्क निर्धारण गरेका छौं ।

अनलाइन माफर्त् टिकट खरीद गर्नेलाई पाँच रुपैयाँ छुटको व्यवस्था समेत गरेका छौं । यस पटकको क्यान इन्फोटेकमा हामीले टिकटलाई पेपरलेस (डिजिटल) बनाएका छौं ।

प्रदर्शनीमा पत्रकार, अपाङ्ग, अशक्त तथा ७० वर्ष उमेर माथिका नेपाली नागरिकहरुलाई निशुल्क प्रवेशको व्यवस्था मिलाएका छौं ।

नेपालगञ्जमा हुने इन्फोटेकका मुख्य बिशेषता के के छन् ?

बिगतको भन्दा यसपटकको क्यान इन्फोटेक परिस्कृत हुनेछ । बिगतको वर्ष भन्दा यो वर्ष इन्फोटेकमा अवलोकनकर्ताले केही फरक अनुभुति प्राप्त गर्नेछन् ।

यस पटकको इन्फोटेकमा कम्प्युटर, मोबाइल तथा सूचना प्रविधिको बृहत प्रदर्शनी गर्दै छौं । इन्फोटेकमा हामीले अनलाइन अर्निङ, आइटी सचेतना, अनलाइन बिलिङ लगायत विभिन्न विषयमा प्रदर्शनी र रोबोटिक्स प्रतिस्पर्धाको समेत आयोजना गरेका छौं ।

त्यस्तै नेपाली वैज्ञानिकद्धारा निर्मित रोबोट तथा अन्य प्रविधिहरुको प्रदर्शनी, सफ्टवेयरको विकास गर्ने ह्याकथन प्रतियोगिता, पब्जी, फिपा लगायतका विभिन्न खेलहरु इन्फोटेकमा हुनेछन् ।

प्रदर्शनीमा एग्रीकल्चर ड्रोनको प्रदर्शन, फेसबुक तथा टिकटक प्रतिस्पर्धा समेत हुने छ ।