मुलुकमा कोरोना महामारी शुरू भएसँगै विभिन्न गलत सूचनाहरु फैलिए । अझ फेसबुक, युट्युव जस्ता सामाजिक सञ्जालमा गलत सूचना धेरै आए ।

विश्व मै पहिलो पटक देखिएको नायँ रोग कोभिड-१९ बारे अन्योल हुदा के गलत के सही भन्ने छुट्याउन सर्वसाधरणलाई गाह्रो थियो ।

त्यस्ता गलत सूचनालाई कम गर्न र सही जानकारी सर्वसाधरणसम्म पुर्‍याउन केही प्रयत्न पनि भए । त्यसमध्येको एउटा प्लेटफर्म हो नेपाल कोभिड सपोर्ट डटकम ।

नेपालमा कोरोना महामारीको दोस्रो लहर शुरू भएसँगै नेपाल कोभिड सपोर्टले काम सुरु गरेको थियो । उसले कोरोना सम्बन्धी विभिन्न सेवाहरु उपलब्ध गराउँदै आएको छ ।

कोभिडसँग सम्बन्धित सही सूचना उपलब्ध गराउन यो अभियान सूरु गरेको नेपाल कोभिड सर्पोटका संस्थापक दिवेश गिरीले बताए ।

यसले सहि जानकारी दिने, सूचना संकलन र आफ्नो वेबसाइटमा अपडेट गर्ने काम गरिरहेको छ । कोरोना संक्रमणको अवस्थामा कोरोना संक्रमितदेखि सर्वसाधरणलाई धेरै सजिलो भएको छ ।

यसले क्राउड सोर्समार्फत अक्सिजन, प्लाज्मा, टेलिमेडिसन, एम्बुलेन्स, होम पीसीआरलगायतको नम्बर बारे ‘भेरिफाइड’ सूचना प्रदान गर्छ ।

नेपाल कोभिड सपोर्टमा अक्सिजन सप्लायर, एम्बुलेन्स, होम पीसीआर सेवा, ब्लड बैंक, टेलिमेडिसिन, हटलाइन लगायतको सम्पर्क नम्बर राखिएको छ ।

यसमा राखिएका नम्बरमा फोन गरेर सेवा लिएको वा नलिएको जानकारी दिन सकिन्छ । त्यसका लागि ‘थम्सअप’ र ‘थम्सडाउन’को सुविधा रहेको छ ।

नेपाल कोभिड सपोर्टमा राखिएका नम्बरबाट सेवा पाइएमा ‘थम्सअप’मा क्लिक गर्न सकिने छ भने नपाइएमा ‘थम्सडाउन’मा क्लिक गर्न सकिने छ ।

‘थम्सअप’ र ‘थम्सडाउन’बाट कुन नम्बरमा फोन गर्दा सेवा पाइन्छ र कुनमा फोन गर्दा सेवा पाइदैन भन्ने स्पष्ट जानकारी पाइने नेपाल कोभिड सपोर्टले जनाएको छ ।

कुन अस्पतालामा बेडको अवस्था के छ भनेर सरकारले नै जानकारी दिन थालेपछि आफूहरुले त्यसको तथ्यांक नराखेको संस्थापक दिवेश गिरीले बताए ।

नेपाल कोभिड सपोर्टमा ‘एड डेटा’ अप्सन पनि रहेको छ । जसबाट डेटा पठाउन सकिन्छ । उक्त डेटा टिमले ‘भेरिफाइ’ गरेपछि मात्र वेबसाइटमा देखिन्छ ।

साथै ‘जोइनअस’ अप्सनमा क्लिक गरेर कसैलाई स्वयमसेवकको रुपमा काम गर्न मन भएमा त्यहाँ राखिएको फारम भरेर जोडिन सकिन्छ ।

उनीहरुले नेपाल कोभिड १९ सपोर्ट फेसबुक ग्रुप पनि चलाएका छन् । जसबाट धेरै मानिसहरुलाई सहयोग पनि गरेको उनले बताए ।

फेसबुक पेजमार्फत विभिन्न ठाउँमा उपलब्ध भएका अक्सिजनदेखि पीसीआर परीक्षण, डाक्टरको सहयोग चाहिएमालगायतका जानकारी गराउँछन् ।

यसअघि उनीहरुले प्लाजमा कनेक्ट वेबसाइट पनि चलाएका थिए । प्लाज्मा दिन चाहने कोरोना संक्रमणमुक्त र प्लाज्मा लिनुपर्ने अवस्थाका बिरामी तथा उनीहरुका आफन्तलाई जोड्न यो वेबसाइट बनाइएको थियो ।