भूकम्प प्रभावित ११ जिल्लाका स्थानीय निकायहरुले अब इन्टरनेटको शूल्क तिर्नुपर्ने 

भूकम्प प्रभावित ११ जिल्लाहरुमा प्रदान गरिएको निःशूल्क इन्टरनेट सेवाको अवधि सकिएको छ । अब भूकम्प प्रभावित जिल्लाका स्थानीय निकाय, स्वास्थ्य संस्था र माध्यामिक विद्यालयहरुले शूल्क तिरेर मात्रै इन्टेनेटको सेवा लिन पाउने छन् ।

यसअघि नेपाल दूरसञ्चार प्राधिकरण अन्तरगतको ग्रामीण दूरसञ्चार विकास कोष परिचालन गरी भूकम्प प्रभावित ११ जिल्लाहरु (नुवाकोट, रसुवा, सिन्धुपाल्चोक, काभ्रे, गोरखा, धादिङ, मकवानपुर, दोलखा, रामेछाप, ओखलढुङ्गा र सिन्धुली) का ईन्टरनेट सेवा नपुगेका स्थानिय निकाय, स्वास्थ्य संस्था, तथा माध्यामिक विद्यालयहरुमा दुई बर्ष सम्म निशुल्क ब्रोडब्याण्ड ईन्टरनेट सेवा उपलब्ध गराउँदै आएको थियो ।

दूरसञ्चार प्राधिकरणले मंगलबार एक सूचना जारी गर्दैं अब उप्रान्त सम्बन्धित निकायहरुले प्राधिकरणबाट स्वीकृत गरेको महशुल दरमा मात्र सेवा प्रदायकहरुसँग सम्झौता गरी ईन्टरनेट सेवाको उपभोग गर्न जानकारी दिएको हो ।

नेपाल दूरसञ्चार प्राधिकरणले भूकम्प प्रभावित ११ जिल्लाहरुमा ५१२ एमबिपिएसको ब्रोडब्याण्ड इन्टरनेट सेवा उपलब्ध गराएको थियो ।