आईसीटी समाचार
नेपाली ज्योतिषी प्लेटफर्म आस्था ज्योतिष एप सार्वजनिक भएको छ । केही समय अगाडि आस्था ज्योतिष प्लेटफर्म अन्तर्गत वेबसाइट र एन्ड्रोइड एप सार्वजनिक गरेको हो ।
नेपालका प्रतिष्ठित ज्योतिषहरुलाई एउटै प्लेटफर्ममा ल्याउन आस्था ज्योतिषको विकास गरिएको कम्पनीका सञ्चालक पंडित प्रदिप राज पन्तले बताए ।
यो प्लेटफर्मबाट सेवाग्राहीले लाइभ अडियो, भिडिओ कल वा च्याट गरेर विभिन्न ज्योतिषहरुसँग परामर्श लिन सक्नेछन् । परामर्श दर ज्योतिषीहरूको अनुभव अनुसार फरक फरक हुनेछ ।
एपमा दैनिक, साप्ताहिक, मासिक र वार्षिक राशिफल हेर्न सकिन्छ । त्यस्तै आफ्नो कुण्डली (चिना) निर्माण, बर बधुको गुण मिलान, पञ्चाङ्ग आदि सेवा लिन सकिने छ ।
ज्योतिषी तथा पूजापाठ सम्बन्धी सेवा, पूजापाठका सम्पूर्ण समानदेखि लिएर रत्न, रुद्राक्ष, माला आदि बुक गर्न मिल्ने छ । यो एपमा ज्योतिष ब्लग र ज्योतिषीय तथा आध्यात्मिक भिडियो पनि हेर्न मिल्ने छ ।
यो प्लेटफर्मलाई नेपाल, भारत लगायतका अन्य देशहरुमा पनि विस्तार गर्ने कम्पनीको योजना रहेको छ । अहिले अङ्ग्रेजी, नेपाली र हिन्दी गरी तीन भाषामा उपलब्ध रहेको छ । छिट्टै आईओएसमा पनि आस्था ज्योतिष उपलब्ध हुने जनाइएको छ ।
