काठमाडौं । फोनपेले व्यवसाय तथा संस्थाहरूका लागि लक्षित गर्दै ‘फोनबिज’ नामक डिजिटल भुक्तानी प्लेटफर्म सार्वजनिक गरेको छ । यसमार्फत व्यवसायले कर्मचारीको तलब, बिल, भेन्डर तथा आपूर्तिकर्तालाई गरिने भुक्तानीलगायत वित्तीय कारोबार एउटै प्लेटफर्मबाट व्यवस्थापन गर्न सक्नेछन् ।

व्यवसायमा हुने विभिन्न किसिमका भुक्तानीलाई एउटै प्रणालीमा समेट्दै कारोबार व्यवस्थापनलाई सहज र व्यवस्थित बनाउने उद्देश्यले फोनबिज ल्याइएको हो । प्लेटफर्मले भुक्तानीसँगै कारोबारको विवरण, वित्तीय गतिविधि र रिपोर्टिङलाई समेत एउटै स्थानमा उपलब्ध गराउनेछ ।

फोनबिजमा कर्मचारीको तलब सामूहिक रूपमा भुक्तानी गर्न सकिने सुविधा रहेको छ । धेरै कर्मचारी भएका संस्थाले एउटै प्रणालीबाट तलब वितरण गर्न सक्ने भएकाले यसले परम्परागत रूपमा हुने म्यानुअल प्रक्रियालाई कम गर्न सहयोग गर्नेछ ।

त्यस्तै, व्यवसायले आफ्ना विभिन्न बिल तथा उपयोगिता सेवाको भुक्तानी पनि फोनबिजमार्फत गर्न सक्नेछन् । भुक्तानीको अभिलेख एकै स्थानमा रहने भएकाले कारोबारको निगरानी तथा वित्तीय हिसाब व्यवस्थापनमा सहज हुने कम्पनीको दाबी छ ।

धेरै भेन्डर तथा आपूर्तिकर्तासँग कारोबार गर्ने व्यवसायका लागि पनि फोनबिजमा भुक्तानी व्यवस्थापनको सुविधा राखिएको छ । यसबाट विभिन्न भुक्तानीलाई व्यवस्थित रूपमा सञ्चालन गर्नुका साथै कारोबारको रेकर्ड राख्न सकिनेछ ।

प्लेटफर्ममा कारोबारको अवस्था र भुक्तानीसम्बन्धी जानकारी हेर्न सकिने व्यवस्था छ । रियल टाइम कारोबार विवरण तथा सूचनामार्फत व्यवसायले आफ्नो भुक्तानी गतिविधि निगरानी गर्न सक्नेछन् ।

फोनबिजमा कारोबारको तथ्यांक विश्लेषण तथा वित्तीय रिपोर्ट तयार गर्न सकिने सुविधा पनि रहेको छ । कारोबारसम्बन्धी विवरणले संस्थालाई आन्तरिक हिसाब मिलान, वित्तीय अनुगमन तथा लेखापरीक्षणमा समेत सहयोग पुर्‍याउने अपेक्षा गरिएको छ ।

व्यावसायिक कारोबारको सुरक्षालाई ध्यानमा राख्दै फोनबिजमा २५६ बिट एसएसएल इन्क्रिप्सन तथा बहु-स्तरीय स्वीकृति प्रणाली राखिएको छ । बहु-स्तरीय स्वीकृतिको व्यवस्थाले संस्थाले कारोबारअघि विभिन्न तहबाट अनुमति लिनुपर्ने प्रक्रिया निर्धारण गर्न सक्नेछन् ।

फोनबिजको सुरुआतसँगै फोनपेका पुराना मर्चेन्ट सेवासमेत स्तरोन्नति गरिएको छ । यसअघि सञ्चालनमा रहेको फोनपे मर्चेन्ट पोर्टल र फोनपे बिजनेस एपलाई ‘फोनबिज बाई फोनपे’ नामअन्तर्गत स्तरोन्नति गरिएको हो ।

विद्यमान प्रयोगकर्ताले नयाँ खाता खोल्नुपर्ने छैन । उनीहरूले पुरानै लगइन आईडी र पासवर्ड प्रयोग गरी नयाँ प्लेटफर्ममा पहुँच पाउनेछन् । डिजिटल भुक्तानी व्यवस्थापन, कारोबार स्टेटमेन्ट, ग्राहकबाट भुक्तानी अनुरोध तथा रिफन्डलगायत सुविधा पनि फोनबिजमा निरन्तर रहने बताइएको छ ।

व्यवसायका वित्तीय गतिविधि डिजिटल माध्यममा रूपान्तरण भइरहेका बेला फोनबिजले तलब, बिल, आपूर्तिकर्ता र अन्य भुक्तानीका लागि छुट्टाछुट्टै प्रणाली प्रयोग गर्नुपर्ने अवस्थालाई कम गर्ने लक्ष्य राखेको छ ।

फोनपेको विद्यमान डिजिटल भुक्तानी पूर्वाधारलाई व्यवसायिक कारोबार व्यवस्थापनसँग जोडेर थप व्यापक सेवा उपलब्ध गराउने उद्देश्यसहित फोनबिज ल्याइएको कम्पनीले जनाएको छ ।