सामसङले आफ्ना उपभोक्ताहरुका लागि शुन्य प्रतिशत ब्याज दर रहेको वित्तीय सुविधायुक्त नयाँ सुलभ कार्यक्रम इन्स्टा फाइनान्स प्रारम्भ गरेको छ ।

यो योजना २५ हजार रुपैयाँभन्दा बढी मुल्यका सामसङ स्मार्टफोन खरिद गर्ने ग्राहकहरुका लागि लागू हुनेछ । ग्राहकहरुले सजिलैसंग आफ्नो चाहना बमोजिमको स्मार्टफोन किन्न सक्षम भई वित्तीय समावेशीकरणमा सहयोग पुर्‍याउने उद्देश्यले इन्स्टा फाइनान्स ल्याएको सामसङले जनाएको छ ।

स्मार्टफोन आजका दिनमा नभै नहुने अत्यावश्यक सामग्री भैसकेको छ । मानिसहरु आफ्नो फोनमा यति निर्भर भैसके की स्मार्टफोन बिनाको जीवनको परिकल्पना पनि गर्न सक्ने अवस्था छैन् ।

यसका अतिरिक्त, विश्व अब डिजिटलमय हुँदै गैरहेको छ, र मानिसहरु अझ धेरै प्राविधिक रुपमा एड्भान्स हुँदै गएका छन्, यस्तो अवस्थामा अझ राम्रो स्मार्टफोनहरुको माग दिनप्रति दिन बढीरहेको छ । मानिसहरु स्तरीय स्मार्टफोन किन्न लालायित छन् तर उनीहरु आफ्नो खर्चको सीमाको कारण बाँधिएका छन् ।

यही तथ्यलाई दृष्टिगत गर्दै सामसङ नेपालले मानिसहरुको स्तरोन्नतिमा सहायता पुर्‍याउन हुलास फिन सर्भ (एचएफएल) संगको सहकार्यमा इन्स्टा फाइनान्स सुविधा ल्याएको हो ।

सामसङ इन्स्टा फाइनान्स झन्झटरहित, तत्काल फाइनान्स सुविधा उपलब्ध हुने सहज उपाय हो, जसको मासिक किस्ताको ब्याजदर शुन्य रहेको छ ।

सामसङ नेपालका निर्देशक प्रणय रत्न स्थापितले ग्राहकको आवश्यकतालाई ध्यानमा राख्दै इन्स्टा फाइनान्स ल्याएको बताए ।

प्रारम्भमा, सामसङले नेपालका सम्पूर्ण प्रमुख बजारका २०० वटाभन्दा धेरै शोरुमहरुमा यो इन्स्टा फाइनान्स सुविधा उपलब्ध गराउनेछ । यो योजनालाई अर्को महिनासम्ममा आफ्नो नेटवर्कमार्फत् बढाउँदै लग्ने योजना सामसङको रहेको छ ।

सामसङ इन्स्टा फाइनान्सले कसरी काम गर्दछ ?

यो अत्यन्त सरल, झन्झटरहित, र तुरुन्तै हुने प्रक्रिया हो र यसको लागि क्रेडिट कार्डको समेत जरुरुत पर्ने छैन । ग्राहकहरुले केही सामान्य प्रक्रियाहरु  पूरा गरेपछि  तत्काल  कर्जा प्राप्त गर्न सक्दछन् ।

ग्राहकहरुले आवश्यक कागजातहरु (आवेदकको नागरिकता प्रमाणपत्र, र फोटो, ग्यारेन्टर बस्नेको नागरिकता प्रमाणपत्र र फोटो तथा आवेदकको आयस्रोत खुलेको पत्र) सहित इन्स्टा फाइनान्सको सेवा प्रदान गरिरहेको स्टोरमा जानु पर्नेछ ।

यसरी उपलब्ध गराइएका कागजाताहरु प्रमाणिकरण भएपछि ग्राहकहरुले कानूनी कागजातहमा हस्ताक्षर गर्नु पर्नेछ, त्यस पश्चात् उनीहरुले चाहेको स्मार्टफोन प्राप्त गर्न सक्नेछन् ।

यो कार्यक्रम ग्राहकहरु र स्मार्टफोन रिटेलरहरु दुबैका लागि लाभदायक हुनेछ । ग्राहकहरुले सजिलै ऋण सुविधा पाउने छन् भने न्यूनतम शुल्कमा नै आफ्नो रोजाइको स्मार्टफोनहरु खरिद वा अपग्रेड गर्न सक्दछन । ‍