नेपाल इन्टरनेट फाउन्डेसनले लैङ्गिक हिंसा विरुद्वको १६ दिने अभियानको अवसरमा आईतबार गोष्ठी आयोजना गरेको छ ।

राष्ट्रिय नाचरघर जमलमा अपराह्न ४ बजेदेखि शुरू हुने उक्त गोष्ठी ‘महिला, बालबालिका सशक्तिकरणको लागि इन्टरनेट’ विषयमा छलफल  हुनेछ ।

सूचना प्रविधि क्षेत्रमा आवद्व र समुदायहरुलाई सशक्तिकरण गराउने, सक्षम र सचेतना वृद्धि गर्ने र इन्टरनेटको सहजीकरण गर्ने उद्देश्यसहित यो कार्यक्रम आयोजना गर्न लागिएको हो ।

कार्यक्रमको प्रमुख अतिथिमा महिला, बालबालिका तथा ज्येष्ठ नागरिक मन्त्री उमा रेग्मीको सहभागीता रहने छ । १६ दिने कार्यक्रम अन्तर्गत विगत केहि वर्षदेखि नेपालको सामाजिक, प्राविधिक र अनुसन्धानको क्षेत्रमा काम गर्दै आइरहेको संस्था नेपाल इन्टरनेट फाउण्डेशनले हालै रसुवाको उत्तरगयामा कम्युनिटी नेटवर्क स्थापना गरेको छ ।

त्यस्तै संस्थाले कानपुर, काभ्रेमा विद्यालयमा छोरी बचाऊ, छोरी पढाऊ नारासहित महिला सशक्तिकरणका लागि कार्यक्रम आयोजना गरेको थियो । त्यो  क्षेत्रमा इन्टरनेटको पहुँच नभएको पाइएपछि नेपाल इन्टरनेट फाउण्डेशनले त्यहाँ इन्टरनेट जडान गरिदिएको थियो ।

यसपछि फाउण्डेशनले  काठमाडौँ विश्वविद्यालयमा लैगिंक हिंसाको विरुद्ध कार्यक्रम आयोजना गरेको थियो । कार्यक्रमको नारा ‘घरबाट सुरु गरौँ महिला हिसां अन्त गरौँ’ रहेको थियो ।

शुक्रबार संस्थाले त्रिभुवन विश्वविद्यालयमा कार्यक्रम आयोजना गरेको थियो । शनिबार संस्थाले सम्पूर्ण सरोकारवालाहरुसँग बैठक आयोजना गरेको छ । आइतबार अवार्ड र प्रमाणपत्र वितरण गर्दै कार्यक्रमको समापन गरिने छ ।

यस गोष्ठीमा मन्त्रालय, नेपाल दूरसञ्चार प्राधिकरण, सेल्फी विथ डटर, जेसीआई बुढानिलकण्ठ, सजिलो पे, एनआरएन, आई मार्क, आइसिटी समाचार, भायानेट लगायतका संस्थाको सहयोग रहेको छ ।

फाउन्डेसनले यसअघि नेपालमा पहिलो पटक सेल्फी विथ डटर अभियान पनि शुरू गरेको थियो । एक महिनासम्म सञ्चालन भएको अभियानमा ५०० बढिले आफ्नो छोरीसँग  सेल्फी खिचेर पठाएका थिए ।

सेल्फी विथ डटर अभियान भारतको हरियाणाबाट शुरु गरिएको हो र भारतीय प्रधानमन्त्री नरेन्द्र मोदीले उनको ‘मन की बात’ कार्यक्रम लगायत धेरै कार्यक्रममा यस अभियानको प्रशंसा गरेका छन् ।

यस अभियानलाई नेपालका जनताले धेरै मन पराएको र महिला सशक्तिकरणका लागि नयाँ आयाम स्थापित गरेको छ ।

यो पनि पढ्नुहोस्ः नेपाल इन्टरनेट फाउण्डेशनले रसुवामा तयार गर्‍यो ‘कम्युनिटी नेटवर्क’

नेपालमा पनि सुरु भयो ‘सेल्फी विथ डटर’ अभियान