नेपाल दूरसञ्चार प्राधिकरणले चालु आर्थिक वर्ष २०८१/८२ मा आवश्यक पर्ने परामर्श सेवा उपलब्ध गराउन चाहने इच्छुक व्यक्ति, फर्म वा संस्थालाई सूचीकृत हुन अनुरोध गरेको छ । 

सोमबार सूचना प्रकाशित गर्दै प्राधिकरणले सार्वजनिक खरिद ऐनको दफा ६ (क) तथा सार्वजनिक खरिद नियमावली, २०६४ को नियम १८ (संशोधन सहित) तथा नेपाल दूरसञ्चार प्राधिकरण खरिद विनियमावाली, २०७३ को विनियम २२ मा भएको कानूनी व्यवस्था बमोजिम सूचीकृत हुन आह्वान गरेको हो । 

इच्छुक व्यक्ति, फर्म, संस्था वा कम्पनीले नेपाल दूरसञ्चार प्राधिकरणको वेबसाइटको लिंक (https://standinglist.nta.gov.np/ मा आवश्यक विवरण भरी सूचीकृत हुन सक्ने छन् ।

साथै आर्थिक वर्ष २०८०/८१ मा प्राधिकरणमा सूची दर्ता भएका व्यक्ति, फर्म, संस्था वा कम्पनीले आव २०८१/८२ मा मौजुदा सूचीमा अद्यावधिक गर्न चाहेमा मौजुदा सूचीमा पुनः सूचीकृत गर्न सक्ने छन् । 

रीत नपुगी आएका निवेदनलाई मान्यता नदिइने साथै दर्ता भएका निवेदनहरू सूचीकृत गर्ने वा नगर्ने भन्ने सम्पूर्ण अधिकार प्राधिकरणमै सुरक्षित रहने बताइएको छ ।

सूचीमा दर्ता गर्दा आवश्यक पर्ने कागजात

क) संस्था दर्ता वा नवीकरण भएको प्रमाणपत्रको प्रतिलिपि

ख) स्थायी लेखा नम्बरको प्रमाणपत्रको प्रतिलिपि

ग) मूल्य अभिवृद्धि कर दर्ताको प्रमाणपत्र (मू.अ.करमा दर्ता हुनेको हकमा मात्र) को प्रतिलिपि

घ) आर्थिक वर्ष २०७९ / ८० को कर चुक्ता प्रमाणपत्रको प्रतिलिपि

ङ) प्रचलित कानून बमोजिम अयोग्य नभएको वा कालोसूचीमा नपरेको व्यहोरा खुलाइएको स्वः घोषणाको निवेदन

च) व्यवसायिक इजाजतपत्रको प्रमाणपत्रको प्रतिलिपि

छ) कम्पनी ऐन, २०६३ को दफा ४६ को उपदफा १० अनुसार तयार गरिएको शेयरधनी र डिबेन्चरवालाको दर्ता कितावको प्रमाणित प्रतिलिपि ।