काठमाडौं । ओपनएआईले च्याटजीपीटीको भ्वाइस फिचरलाई अझ प्रभावकारी बनाउन GPT Live-1 र GPT Live-1 Mini नामका दुई नयाँ मोडल सार्वजनिक गरेको छ ।

यसअघि प्रयोग हुने प्रणालीमा प्रयोगकर्ता पूर्ण रूपमा बोल्न रोकिएपछि मात्र एआईले जवाफ दिन्थ्यो । कुराकानीका क्रममा प्रयोगकर्ता केही क्षण मात्र रोकिँदा पनि एआईले कुरा सकिएको ठानेर बीचमै बोल्न थाल्थ्यो, जसले गर्दा स्वाभाविक संवादमा बाधा पुग्थ्यो ।

ओपनएआईका अनुसार नयाँ मोडलहरूले यी कमजोरीहरू हटाएर च्याटजीपीटीसँगको कुराकानीलाई मानिस–मानिसबीचको संवादजस्तै प्राकृतिक, सहज र निरन्तर बनाउनेछन् ।

नयाँ GPT Live-1 र GPT Live-1 Mini मोडलहरू डुप्लेक्स (Duplex) प्रविधिमा आधारित छन् । अब एआईले आफ्ना कुरा भनिरहँदा पनि प्रयोगकर्ताको आवाज एकैसाथ सुन्न, बुझ्न र त्यसअनुसार प्रतिक्रिया दिन सक्नेछ । यसले दुई जना मानिसबीच हुने प्राकृतिक संवादजस्तै अनुभव प्रदान गर्नेछ । साथै, यसले रियल-टाइम अनुवाद गर्न पनि सक्षम हुनेछ ।

यी मोडलहरू अझ स्मार्ट पनि छन् । यदि प्रयोगकर्ताले जटिल प्रश्न सोधे वा इन्टरनेटमा खोज्नुपर्ने विषय उठाए भने, प्रणालीले ब्याकग्राउन्डमा ओपनएआईकै शक्तिशाली GPT-5.5 मोडलको सहायता लिनेछ । यो प्रक्रिया प्रयोगकर्तालाई थाहा नहुने गरी सञ्चालन हुने भएकाले कुराकानीमा कुनै अवरोध आउने छैन ।

ओपनएआईले भ्वाइस मोडलाई अझ उपयोगी र स्वभाविक बनाउन थप सुधारहरू पनि गरेको छ । अब एआई धेरै छिटो बोलेमा प्रयोगकर्ताले बीचमै रोक्दै "बिस्तारै बोल" भन्न सक्नेछन्, र त्यसपछि एआईले आफ्नो बोल्ने गति घटाउनेछ ।

त्यसैगरी, मानिसले बोलिरहेका बेला एआईले बीच बीचमा सुन्दै गरेको संकेतस्वरूप साना प्रतिक्रिया पनि दिनेछ । ब्याकग्राउन्डमा हल्ला वा अन्य आवाज भएपनि यसले प्रयोगकर्ताको आवाज स्पष्ट रूपमा छुट्याएर बुझ्न सक्ने कम्पनीले जनाएको छ ।

नयाँ भ्वाइस मोडले अब बोल्ने मात्र होइन, स्क्रिनमा मौसम, खेलकुद, शेयर बजारलगायतका जानकारी पनि देखाउन सक्नेछ । साथै, पहिलेझैँ तस्बिर तथा फाइल अपलोड गर्ने र इन्टरनेटमा खोजी गर्ने सुविधा पनि उपलब्ध रहनेछ ।

ओपनएआईले भ्वाइस मोडलाई अझ सुरक्षित बनाउन नयाँ सुरक्षा व्यवस्था पनि लागू गरेको छ । कुराकानीका क्रममा जोखिमपूर्ण वा अनुपयुक्त विषय आएमा एआईले सुरक्षित रूपमा प्रतिक्रिया दिनेछ । आवश्यकता परेमा त्यस्ता कुराकानी रोक्न सक्ने व्यवस्था पनि गरिएको कम्पनीले जनाएको छ ।

विशेष गरी किशोर–किशोरीहरूको सुरक्षालाई ध्यानमा राख्दै अभिभावकहरूले भ्वाइस मोड बन्द गर्न सक्ने सुविधा पनि थपिएको छ । यदि कुनै किशोर वा किशोरीले एआईसँग आत्म-हानि वा अन्य संवेदनशील विषयमा कुरा गर्न खोजेमा, प्रणालीले अभिभावकलाई मोबाइलमा सन्देश वा सूचना (नोटिफिकेसन) पठाउने व्यवस्था गरिएको कम्पनीले जनाएको छ ।

ओपनएआईले आजैदेखि एन्ड्रोइड, आईओएस र वेब संस्करणमा च्याटजीपीटीको नयाँ GPT Live फिचर उपलब्ध गराउन सुरु गरेको छ । Go, Plus र Pro सदस्यता लिएका प्रयोगकर्ताले मुख्य GPT Live-1 मोडल प्रयोग गर्न पाउनेछन् । नि:शुल्क (Free) खाताका प्रयोगकर्ताका लागि भने यसको हल्का संस्करण GPT Live-1 Mini उपलब्ध हुनेछ ।