काठमाडौं । त्रिभुवन विश्वविद्यालय (त्रिवि) व्यवस्थापन संकायको परीक्षा नियन्त्रण महाशाखाले स्नातक, स्नातकोत्तर तथा एमफिल तहका परीक्षार्थीका लागि परीक्षा अवधिभर पालना गर्नुपर्ने नयाँ निर्देशन जारी गरेको छ ।

परीक्षालाई मर्यादित, व्यवस्थित र निष्पक्ष बनाउन भन्दै विश्वविद्यालयले अनिवार्य नियम सार्वजनिक गरेको हो । हालै एमबीएसको प्रश्नपत्र सामाजिक सञ्जाल ह्वाट्सएपमार्फत बाहिरिएको घटनापछि त्रिविले परीक्षा व्यवस्थापनमा थप कडाइ गरेको आकलन गरिएको छ ।

साउन ११ गते जारी सूचनाअनुसार परीक्षार्थीले प्रत्येक परीक्षामा परीक्षा नियन्त्रण महाशाखाबाट जारी गरिएको आधिकारिक प्रवेशपत्र अनिवार्य रूपमा साथमा ल्याउनुपर्नेछ । साथै, तोकिएको समयभन्दा कम्तीमा ३० मिनेटअघि परीक्षा केन्द्रमा उपस्थित हुनुपर्ने व्यवस्था गरिएको छ ।

त्रिविले परीक्षा कक्षमा प्रवेश गरेपछि परीक्षा समाप्त नभएसम्म बाहिर निस्कन नपाइने जनाएको छ । त्यस्तै, परीक्षा सुरु भएको पहिलो एक घण्टा र समाप्त हुनुअघि अन्तिम आधा घण्टा कुनै पनि परीक्षार्थीलाई कक्षाबाहिर जान अनुमति नहुने उल्लेख गरिएको छ ।

विश्वविद्यालयले मोबाइल फोन, स्मार्टवाच तथा अन्य कुनै पनि इलेक्ट्रोनिक उपकरण, साथै चिट, पुस्तक वा अन्य अनधिकृत सामाग्री परीक्षा कक्षमा लैजान पूर्ण रूपमा प्रतिबन्ध लगाएको छ ।

त्यस्तै, नक्कल गर्ने, अरूलाई नक्कल गर्न सहयोग गर्ने, परीक्षा सञ्चालनमा अवरोध पुर्‍याउने वा अनुशासन विपरीत गतिविधिमा संलग्न हुने परीक्षार्थीमाथि विश्वविद्यालयको परीक्षा नियमावलीअनुसार कारबाही गरिने चेतावनी दिइएको छ ।

सूचनामा केन्द्राध्यक्ष, सुपरिवेक्षक, निरीक्षक तथा परीक्षा कर्मचारीले दिएका निर्देशन अनिवार्य रूपमा पालना गर्न पनि परीक्षार्थीलाई आग्रह गरिएको छ ।

व्यवस्थापन संकायले परीक्षा नियम र आचारसंहिताको उल्लङ्घन गर्ने परीक्षार्थीको परीक्षा रद्द, निष्कासन तथा आवश्यक परे कानुनी कारबाही समेत हुन सक्ने जनाएको छ ।

साथै, सबै परीक्षार्थीलाई अनुशासित, मर्यादित र निष्पक्ष वातावरणमा परीक्षा सम्पन्न गराउन सहयोग गर्न व्यवस्थापन संकायले अनुरोध गरेको छ ।